Autoritetet shqiptare nisin procedurat për rrjetin 4G në Shqipëri

Qeveria shqiptare ka nisur procedurat për futjen për herë të parë në Shqipëri të shërbimit 4G. Lajmi bëhet i ditur për agjencinë NOA.al nga burime zyrtare të Këshillit të Ministrave.

“Ne sapo kemi lëshuar licencën e dytë 3G dhe po përgatisim kuadrin për të nxjerrë shërbimin 4G”, – deklaroi kryeministri Sali Berisha.

Dikur një nga vendet me normën më të ulët të penetrimit të teknologjisë së informacionit në botë, në nivelin 4.8% në vitin 2006, Shqipëria e ka rritur këtë normë në 50 për qind në vitin 2011, dhe Berisha thotë se ajo vazhdon të mbetet një nga prioritetet më të mëdha të qeverisë.

“Dy vitet e ardhshme do të jenë vendimtare”, – tha Kryeministri dhe shtoi: “Ne po përpiqemi të sigurojmë internet me brez super të shpejtë në vend. Shqipëria ka një penetrim të madh të telefonave celularë, më të lartë se mesatarja e Evropës”.

Aktualisht në Evropë është Gjermania ajo që ka hedhur e para shërbimin 4G përmes kompanisë T-Mobile e Deutsche Telekom, pjesë e të cilës është dhe kompania AMC në Shqipëri. Kjo e fundit sapo ka marrë licencën për shërbimin 3G dhe pritet shumë shpejt të lançojë hedhjen në treg të këtij shërbimi.